ऐका भोळे भाविकजन । नित्य करा गुरुचिंतन ।
महादोष होती दहन । स्मरणमात्रें करुनिया ॥ध्रु०॥
गुरुसेवा घडेल ज्यासी । काळ दंडीना तयासी ।
अंतीं जाय मोक्षपदासी । गुरुस्मरण केलिया ॥१॥
गुरु भक्तीचा दाता । गुरु देहासी चालविता ।
हरे पातकाची व्यथा । गुरुस्मरण केलिया ॥२॥
गुरु ज्ञानाचा सागरु । गुरु धैर्याचा आगरु ।
गुरु नेईल पैल पारु । नामस्मरण केलिया ॥३॥
गुरु मायेचें निरसन । गुरु मायेचें अंजन ।
गुरुचें अगाध महिमान । मुखें कित्येक वदावें ॥४॥
गुरु संतांचें निजगुज । गुरु मंत्रांचें निजबीज ।
गुरुचें घ्यावें चरणांबुज । अनेक तीर्थें त्या ठायीं ॥५॥
जयजय गुरु मायबापा । चुकवी चौर्यांशीच्या खेपा ।
भक्तराज ध्यातो गुरुबापा । ब्रह्मीं लय लावुनिया ॥६॥